راپورت: عبدالرحمن بامەرنی
دەما مە زارۆكێن خوە برینە ژ دەرڤەی وەلاتی بۆ چارەسەریێ، گوتنە مە، زارۆكێن وە حالەتێ تێكچوونێ لدەف هەیە و پێدڤیا ڤان ب سەنتەرەكێ چاڤدێریكرنێ و راهێنانێ هەیە. ئەڤە گوتنێن ئێك ژ دامەزرێنەرێن سەنتەرێ ناز دهوك یێ (هەرەوەزی) بۆ مەشق و راهێنانا زارۆكێن ئوتیزمێ بوون، دا ژ نێزیك بزانین، ئەڤ سەنتەرە چاوان پێشوازیا زاروكێن تێكچویی ب ئوتیزمێ دكەت.
لدوور پرسا مە، ئایا چ سال ئەڤ سەنتەرە هاتیە دامەزراندن و وە چاوان بیر ل ڤەكرنا سەنتەرەكێ ژڤی رەنگی كر، خالد جەمال وەك ئێك ژ دامەزرێنەرێن ڤی سەنتەری و كارگێرێ ئیداری ل سەنتەری گوت: من بخوە دوو زارۆك هەنە و حالەتێ ئوتیزمێ لدەف هەردوویان هەیە. ئەز باوەرم گەلەك دەیبابێن دی ژی وەك من زارۆكێن ژڤی رەنگی یێن هەین و رەنگە هندەكان زانی بیت، كو زارۆكێن وان ئوتیزم لدەف هەیە و گەلەكێن دی نەزانینە و بەردەوام ل چارەسەریێ دگەرن. هزرا ڤەكرنا سەنتەری ژی هەر ژڤێ چەندێ هاتیە و ئەم چەند بابەك كو مە هەمیان زاروكێن ژڤی حالەتی هەین، مە بیر ل وێ چەندێ كر ئەم هزرێ د ڤەكرنا سەنتەرەكی دا بكەین، بۆ چارەسەركرنا زارۆكێن خوە و گەلەك زارۆكێن دی یێن وەك یێن مە. ژبەركو ئەم دڤێ ئەزمونێ دا دەرباز بووینە و هەم بۆ دەیبابان چەند نەخوشی و بۆ زارۆكێن وان ئەگەر نەهێنە چارەسەركرن و خوشبەختانە، ئەم شیاین ل 2/4/2012ێ ڤی سەنتەرێ دامەزرینین و گەلەك زارۆك شیاینە ژ دەف مە دەربچن و بارودوخێ وان گەلەك باشتر بوویە.
ستافێ سەنتەرێ ناز دهوك ژ چەند كەسان پێكدهێت، زاتی باكوزی بەرسڤا ڤێ پرسیارێ بڤی رەنگی دا و گوت: ئەم چار كەس دامەزرێنەرێن ڤی سەنتەری نە، ناڤێن وان ژی (دكتورە بێریڤان، سەردار ئاكرەی، خالد جەمال و زاتی باكوزی)، دگەل دا ژی دوو بسپورێن ئەكادیمی بۆ دەستنیشانكرنا حالەتێ زارۆكی هەنە، دكتور دلشاد ماجستەر پەروەردا تایبەت و دكتورا وی ژی ل سەر تێكچوونا ئوتیزمێ یە، نازێ خان كو ماجستەرا خوە ب زانستێ دەرونی ل روسیا بدەست ڤەئینایە و دیسان هەر ئێكی ژڤان جێگرەك هەیە و مە 48 راهێنەر هەنە و بۆ هەر نەخوشەكی یان دوو نەخوشان مە راهێنەرەك هەیە.
دامەزراندنا سەنتەران پشتەڤانیەكا دارایی بۆ دڤێت، ئایا ئەو چ لایەن بوون، ئەڤ پشتەڤانیە بۆ كری، خالد جەمالی بەرسڤا ڤێ پرسێ بڤی رەنگی دا و گوت: دەما مە سەنتەر دامەزراندی، مە دیت، گەلەك كەسان پێچێنابیت زارۆكێن خوە بینە سەنتەرێ ئەهلی، ئەم چووینە سەر پەیچێ ئەلەكترونی یێ سەروكاتیا هەرێمێ و مە بیروكەیا سەنتەرێ حكومی بۆ دیار كر و رۆژا پاشتر وان داخوازا مە كر و ئەم چووینە دەف وان، مە گوتێ ل سلێمانیێ سەنتەرەك هەیە و هێرو ئیبراهیم پالپشتیا وان دكەت و ل هەولێرێ ژی رێكخراوا قەندیل پالپشتیا وان دكەت، بتنێ دهوكێ نەبیت، ئینا مەزاختیێن سەنتەری ژلایێ سەروكاتیا هەرێمێ ب سوپاسی ڤە هاتنە پالپشتیكرن و ئەم چووینە لایێ پارێزگارێ دهوكێ و وی ژی پشتەڤانیا خوە بومە دیار كر و هەر ژ بەر پشتڤانیا پارێزگەهێ ژی، مە هەرەوەزی (تعاونی) ب سەنتەری ڤە زێدە كریە.
دا بزانین تێكچووێن ئوتیزمێ چارەسەر دبن یان نە، خالد جەمال گوت: چ چارەرسەریێن دروست بۆ ئوتیزمێ نینن، بەلێ باشتر لێدهێن و تشتێ باش ژ ئوتیزمێ ژی، دەما ئەڤ كەسێن هەنێ بەرەڤ باشتر بوونێ دچن و گوهورین ب سەر رەفتارێن وان دا دهێتە كرنێ، جارەكا دی بو خرابترینێ نا ڤەگەرن یان كو پێنگاڤێن چارەسەریێ بەرەڤ پێش ڤە نە، بۆ ڤێ چەندێ ژی دڤێت خێزان ژی رولێ خوە بگێریت و راهێنانێن بەردەوام هەبن و ئەڤ راهێنانە لدویڤ بەرنامەی بن، ئەگەر نمونەكێ بۆ تە بێژم، ماموستایەكێ دكتور، ل دەف نازێ خان ل موسكو هەبوو و موحازەرە ژی ل كولیژێ ددان، بەلێ نەدزانی بچیتە دەست ئاڤێ، دڤیابا هەر جار قەستا مال كربایە یان جارەكێ دەیكا وی بۆ چاكیتەكێ زڤستانێ دئینیت، ل كولیژێ و جهێ ل ژوورا رونشتنێ وك ماموستایێن هەڤكارێ خوە چاكیتێ خوە ل جهێ وان یێ تایبەت دهلاویسیت، لێ دەما موحازەرێن وی تەمام دبن و دا دەركەڤیت، نزانیت چاكیتێ وی كیشكە و خوە دگریت، تا هەمی ماموستایێن دی چاكیتێن خوە دكەنێ و ئەوێ مای، شنی ئەو دزانیت كو یێ وی یە یان كو، حالەت بتنێ بەرەڤ باش بوونە و چ چارەسەریێن دووماهیێ بۆ ئوتیزمێ نینن.
ئایا هین چ ژ خەلكی یان حكومەتێ دخوازن؟ ئەڤە پرسا مەبوو، زاتی باكوزی گوت: ژبەركو ئەڤ جورێ تێكچوونێ یێ بەربەلاڤە و لدویڤ ڤەكولینان هەر 88 زارۆكان ئێك توش دبیتێ، ئەم حەز دكەین، زێدەتر پیتە ب سەنتەری بهێـتەدان و پشتەڤانی ل دەیباێن زارۆكان بهێتەكرن و هیڤیدارن ژ خەلكێ خوە ژی دیڤچوونا زارۆكێن خوە بكەن و هەر كەسێ گومان ل سەر رەفتارێن زاروكێ خوە هەبیت یان زوی نە ئاخڤیت، بلا سەرەدانا مە بكەت و مە كەسێن بسپور دڤی بواری دا هەنە و بێ بەرامبەر ئەم دێ وان پشكنین كا ئەڤ حالەتە لدەف هەیە یان نە.
ليست هناك تعليقات:
إرسال تعليق