عبدالرحمن بامه‌رنى
تشتێ بەری چەند رۆژان سەرنجا من راكێشای و ئەز پالدایمە نڤیسینا ڤی گوتارێ، روژا دویێ یا جەژنا رەمەزانێ بوو، خێزانێ ژمن داخازكر ئەم دەركەڤینە گەشتەكێ، یا راستی ژی بیت هەیڤا رەمەزانێ و گەرما هاڤینێ و كارەبا نەخوش و رۆژیگرتن و تا نیڤرو نڤستن دخانی ڤە، ئەم هەمی پێدڤی (رێفرێشەكێ) كربووین، دا ژیانا خوە وەك بەری هەیڤا رەمەزانێ ئاسایی بكەینە ڤە، ئەز ب داخازا وان رازی بووم و ئەڤە ژی ئەو تشت بوو یێ من ژی ژێ حەزدكر. مە بەرهەڤیێن خوە كرن، مە بەری نیڤرو دا رێ و ئێكەم ویستگەهـ ئەم ژ دهوكێ بەرەڤ زاخو برێكەفتین و مە بۆ خوە دانا، ئەم خوارنا نیڤرو ل خارنگەهەكێ ل زاخو بخوین و بەرەڤ رێكا باتیفا و دوكەرێ و ژ وێرێ بۆ بامەرنێ و رێكا ئینشكێ بۆ قەدشێ و بەرەڤ سیلاڤێ و ئەم ب سەر ئامێدیێ كەفتین و مە چەرخەك ل واران ژی دا و د ڤەگەریانێ دا، ئەم هاتینە سەرسنكێ و د رێكا دچیت بۆ سەرێ گارەی مە چەپ دا و چیا و چیا دناڤ گەلی و گر و نهالێن چیایێ گارەی را، ئەم ل ئاشەوا دەركەتین و بۆ رێكا سیارەتیكا و گەلیێ زاویتە ئەم ڤەگەریاینە مالا خوە ل دهوكێ.
تشتێ بویە جهێ پیتەدانا من و ئەز هزرێن خوە ل سەر ڤێ نڤیسینێ كوم ڤەكەم، كوردستان بخوەیە، كوردستان بخوە گەنجینە یە و ب دەهان و سەدان جهێن گەشت و گوزاری لێ هەنە و دشیاندایە، ب پێش ئێخستنا ڤان جهێن گەشت و گوزاری، داهاتەكێ گەلەك باش بۆ كوردستانێ ژێ بهێت، هەر چەندە ئەز بەحسێ داهاتی ناكەم، دێ زێدەتر ئەو تشتێن كەتینە بەرچاڤێن من بەحس كەم! یا راستی بیت، ئەو خەلكێن كەتینە بەرچاڤێن من، ژ گەلەك پیكهاتەیان بوون، كورد بوون، ژ هەولێرێ و سلێمانیێ و كەركوكێ دوو خێزان مە دیتن و مە هەڤنیاسینێ دگەل دا كر، گوتی ئەم یێن ژ هەلەبچە هاتین دا دهوكێ و جوانیا دهوكێ ببینین، دوویراتیا هەلەبچە ژ دهوكێ ژی بكێماتی نزیكی پێنج بۆ شەش سەعەتێن ترومبێلێ یە. عەرەب مە دیتن، ژ بەغدا و خوە باشورێ عیراقێ ژی هاتبوون. تورك مە دیتن، گوت ئەڤ سالە مە گوت دێ سەرەدانا هەرێما كوردستانێ كەین. هاتنا خەلكی ئێكەم تشت نەبوو سەرنجا من راكێشیت، لێ خزمەتكرنا گەشتیاران ژی، بۆ من تشتەكێ نوی بوو، ژبەركو پێشوازیەكا جوان ل وان دهاتە كرنێ. یا من ژ چاڤێن وان گەشتیاران دیتی، كەسێ دلگرانیا خوە ژ مامەلەكرنێ نە ددیت، كو كەسەكی بۆ وان یان خێزانێن وان نەخوش كربیت و نە ئارامی بخولكێ وان ڤە یێ پێڤە دیار بیت. پولیسێن ترافیكێ وەسا ب نەرمی رەفتار دگەل شوفێران دكر و رێنیشاندەر بوون، ئەڤە ژبلی ئەو تشتێن ب بەرچاڤێن من كەفتین، كو ل دكانێن گەروك دهاتنە فروتنێ، تشتێن كەلتوری یێن كوردی بوون. تشتەكێ دی ل (سیلاڤێ) سەرنجا من راكێشای، دەنگێ سترانبێژێ ب ناڤ و دەنگ (تەحسین تاهای) بوو، ئەم ل چاپخانەكێ درونشتی بووین، هندەك خێزانێن عەرەب بۆ ڤەخارنا چایەكێ و هندەك تەزیاتیان لدەف مە رونشتن، من هزركر دێ خودانێ چاپخانێ تەحسین تاهای ب سترانبێژەكێ عەرەب گوهوریت، ژبەر وان خێزانان! لێ خودانێ چایخانێ گوتە من، خوشیا گەشتكرنێ ئەوە، دەما مروڤ سەرەدانا جهەكی بكەت، یان وەلاتەكی، مروڤ تشتەكێ جوداتر ب بینیت، كەلتورێ وی وەلاتی یان دەڤەرێ، سترانبێژێن وی وەلاتی یان وێ دەڤەرێ و خوە مامەلەكرن ژی ناسنامەیا مروڤی نیشان ددەت. ئەڤا من دیتی و من گوهلێبوی، بەراورد دگەل چەند سالێن بوری، ئەز گەلەك كەیفخوەش كرم، ژبەركو عەقلیەتا گەشت و گوزاری یا لدەف مە پەیدا دبیت و ئەم یێ سەرەداڤێن وێ گەنجینەیێ دبینین، ئەوا خودێ كوردستان پێ خەملاندی.
ـ تێبینی درۆژناما صباح كوردستان ژمارە 15 دا هاتیە بلاڤكرن.
ليست هناك تعليقات:
إرسال تعليق