بویعلاوی عبد الرحمان (بویا رەحمان)
وەرگێران: عبدالرحمن بامەرنی
كوشتن:
ئەفسەر ڤەگەریا مالا خوە، سەرخوش، نیڤا شەڤێ، سەرۆكێ خوە ل بەر دەرێ بالەخانێ دیت، وەك پێدڤی سلاڤ كرێ، بلەز ل دەرەجێن بالەخانێ ب سەركەفت، دەرگەهـ ب كلیلێ ڤەكر، چوو د شقا خوە یا بچووك ڤە، هەڤژینا خوە دیت یا سەرێ خوە د شووت، دەستێ خوە برە دەمانجا خوە، دو دل بوو، بەرەڤ لاندكا كورێ خوە یێ ل سەر پشتێ درێژكری چوو، ل سەروچاڤێن وی نێری، د دلێ خوە دا گوت: (ژ راستا ئەو وەكی سەرۆكی یە، چاڤ هەمان چاڤن، دفن دفنا وی یە، گوهـ هەر ئەو گوهن) ساڤای چاڤێن خوە ڤەكرن، بۆ كرە كەنی، د دلێ خوە دا گوت: (یێ بمن دكەتە كەنی، كورێ زنایێ) عاقل د سەری نەما، دەمانجا خوە ئینا دەر، سێ گوللە بەردانێ، ئێك ل سەری و ئێك ل سینگی و ئێك ل زكی، گوللە بەردانە سەروكێ خوە یێ بێخیرەت.
خەونا زارۆكەكێ مەغربی:
ل قوتابخانا گوندێ سەرێ كانیێ (راس الماو)، ئەڤا د كەڤیتە سەر دەریا سپی یا ناڤەراست، زارۆكێ سێوی و هەژار وێنەك كێشا، ب پێنووسێ رساسی، ل سەر كاغەزەكا سپی، نەخشەیێ ئسپانیا و مەغرب، ئسپانیا برەنگێ كەسك وێنە كر، مەغرب ژی برەنگێ رەشی وێنە كر، دناڤبەرا هەردوویان دا ب رەنگێ شینی وێنە كر، پاشی كەشتیەكا داری یا بچووك وێنە كر، بدوو دارجەریفكان ڤە، دناڤ دەریایێ دا، برەنگێ سوری، زارۆك ل بەلەمێ سیار بوو و خاترا خوە ژ وەلاتێ خوە مەغرب خواست.
ڤەگەریانەكا نە ب خێر:
گەنج بوو، پێگەهشتی، دەما گەهشتیە فرەنسا، ژ زورداریا دەستهەلاتا بێ وژدان رەڤی، پشتی سالێن درێژ ل دەربەدەریێ، كەتیەك ڤەگەریا، ب چەندین نەخوشییان، دا ل مالا دەیكا خوە ل (ئەماتیا) بمریت، ل گورستانا باپیرێن خوە بهێتە ڤەشارتن، بێی ئامانجێن خوە و یێن گەلێ خوە بجهـ بینیت.
بیك
زارۆكا ب رۆژێ یاریا ب بیكان دكەت، ب شەڤێ د خەونێ دا دبینیت یا بویە بیك، ل ترومبێلەكا لیموزینا سپی سیارە، قەفتێن گولێن خەملاندی، سور و سپی و ل تەنشتا زاڤایەكێ لاو.
هاوسەرگیری:
سەیێ وێ ( BERGER ALLEMAND ) گوتێ: خاتینا من، تو بۆ شوو ناكەی؟
گوتە وی: ئەز حەز ژ زەلامانان ناكەم، زەلام د نەپاكن.
گوتە وێ: ئەز ژی حەز ژ سا ناكەم.
ماچیكرە لێڤێن وی و چەند ماچ لێدان و هەمبێز كر.
دار:
سەرەرای هشكە سالیێ، دارا مەزن یا خوە راگر بوو، ئەڤا دكەڤیتە نیڤا گورەپانا گوندێ مە، سیبەرا خوە بلاڤ دكر، شێخێ پێش نڤێژێ مزگەفتا گوندێ مە گوت: "ئەڤ دارە یا پیروزە" و ماموستایێ قوتابخانا گوندێ مە گوت: "ئەڤ دارە پشت بەستنێ ب ئاڤا كووراتیا عەردی دكەت" و ل سپێدەهیەكێ، فەرمانبەرێ باژێرڤانیێ دوزەرەكا بچووك ئینا، دا دارێ ژ رها بینتە دەرێ، دا رێكەك دنیڤا گوندی را بهێتە ڤەكرن، بەلێ دوزەرا بچووك دهلكێشانا دارێ دا یا سەركەفتی نەبوو. پێش نڤێژێ مزگەفتا مە گوت: "من نە گوتە هەوە ئەڤ دارە یا پیروزە" و ماموستایێ گوندێ مە گوت: "رهێن دارێ، خوە د عەردی را ئاسێ كرینە" و ل سوبەهی، فەرمانبەر ب دوزەرەكا مەزن ڤە هات، دار ب رهـ و ریشالێن وێ ڤە، ب سەر عەردی ئێخست.
نان:
دەمژمێرا بانكێ ئاماژێ د دەتە ئێك و نیڤێ، ئەز ژ برسا كەتم، ژ شەڤا دی وەرە من چ نەخاری، من چ دناڤ بەرمایكێ خوارنگەهێن مللی دا نەدیت ئەز بخووم، ئەز نانێ سپی و رەش دبینم ل سەر عەرەبانێن بچووك، بێهنا وێ من پالددەت ئەز نانەكێ یان دویان و زێدەتر بدزم، ئەگەر من شییا. من گوتە خوو: "ئایا خازوكیێ ژ نان فروشی بكەم یان ژێ بدزم؟"، بیرا من ل وانا ماموستای هات: "دەستێ بلند بخێر ترە ژ دەستێ نزم"، نزیكی عەرەبانا نانی بووم، من نانەكا سپی رەڤاند، هێشتا یا گەرم بوو، شنی ژ فرنێ دەركەفتبوو، بلەزەكا مەزن من د كرە غار، ل پشت من نان فروش یێ رادهێلتە من و یێ گازی دكەت: "رەڤاند، رەڤاند، رەڤاند"، د دەمێ رەڤینا خوە ژی دا، من بچاڤ برسی نان بەرێڤەی گەوریا خوە دكر.
ليست هناك تعليقات:
إرسال تعليق